【內容介紹】
廣東話資料館最新著作《廣東話潮語唔止1000年》，由最新二〇二〇年至今嘅例如「流量密碼」、「0尊」、「跌嘢唔好搵」、「自肥」，一直向前數，「離地」、「有請小鳳姐」、「火星文」、「屈機」，到九十年代嘅「方丈」、「騎呢」，八十年代嘅「係咁先，唔係咩呀」、「滴汗」、「符碌」，七十年代嘅「的士夠格」、「拉柴」，六十年代嘅「要錯都係社會嘅錯」，五十年代嘅「你班馬騮」、「飽死荷蘭豆」，再繼續數前嘅「行路上廣州」、「電燈柱掛老鼠箱」、「放飛機」；再早啲香港開埠時期嘅「福壽膏」、「賣豬仔」、晚清時期嘅「穿崩」、「打落水狗」；再去到古代清潮時期嘅「做架梁」，明朝時期嘅「飛天光棍」、「發雞盲」，元朝時期嘅「收科」、「趕頭香」，宋朝時期嘅「帶挈」、「巴閉」，五代十國時期嘅「大食」、「眼中釘」，唐朝時期嘅「金叵羅」等等等等。
數完咁多潮語，仲會略略講解「潮語同新詞嘅分別」、「香港潮語著作」同「網絡潮語文化」，希望你睇完，對於出現唔止1000年嘅潮語有多一啲了解。
【作者介紹】
廣東話資料館
廣東嘅語言同方言，主要由［廣府話］，［潮汕話］同［客家話］組成。喺香港通行嘅係〔粵語〕廣州話，廣府人通常叫佢做〔白話〕，而香港人就多數稱呼佢做〔廣東話〕，喺外國嘅華人就叫佢做〔唐話〕。粵語〔廣東話〕主要使用喺廣東、香港、澳門、廣西、海南等地方。喺東南亞嘅新加坡、馬來西亞、越南、印尼等，同北美嘅美國、加拿大，歐洲同澳洲、紐西蘭、聖誕島等等嘅華人社區使用最多嘅一種漢語，估計全球使用粵語來做母語嘅人口約有 1.2 億人。
粵語呢個名，係起源於秦朝人趙陀喺古代嶺南地域所建立嘅第一個國家〔南越國〕。《漢書》寫做〔南粵國〕；簡稱〔南越〕或者〔南粵〕；古代嘅「粵」同「越」係互通字，有資料表示當時佢哋係以〔廣信〕來做嶺南地區嘅政治、經濟同文化嘅中心，係嶺南文化同粵語嘅最早發揚地。
【目錄】
1. 現代新潮語
2. 現代流行語
3. 近代流行語
4. 古代流行語
5. 潮語同新詞嘅分別
6. 香港潮語著作
7. 網絡潮語文化
